S-agârsheashti vârnâoarâ hoara iu ti-amintashi ică u portsâ tu suflitu tutâ eta? S-agârshescu adetsli tsi li-anvitsashi ică li tsâni di pâpâni, strâpâpâni shi li alashi adiatâ ș-la nipotsi tași nu li agârsheascâ? S-agârshescu arâurili tsi cura prit mesi di hoarâ ică li adutsâ aminti di câti ori va beai apâ? S-agârsheashti corlu di trei dipli tsi s-adra cafi duminicâ? S-agârshescu atseali noauă chetsari cu cari nâ-agiucam tutsi ficiuritsii dit mâhâlă? S-agârshescu lăschili tsi-s adra dupâ cafi ploae? Câdeam tu eali shi nâ hârseam câ acâtsam unu pescu! S-agârsheashti sculia iu anvitsăm? Eara tu mesi di hoarâ! Criscumu fârâ bisearicâ tu hoarâ, ama s-agârsheashti vârnâoarâ Dumnidzălu? Tora, tu mesi di hoara easti unâ bisearicâ multu musheată! Câtsi dit voi nu avdzâts di Hagilarea, hoara iu s-amintă Hrista alu Lupci, marili cântâtoru alu armânamiei? Tutsi armânii avdzârâ di elu, ama îl mai tsânetsâ minti pi paplu Mita alu Bushari? I-avdzâts vârnâoarâ gaida? Cari u avdzi unâ oară, nu u agârshi! Anda cânta, m-as îi mutreai prosuplu, videai cumu budzâli îi arâdeau și-i dizvâleau dintsili mușatsi. Ama ocljilji! Ocljilji a lui ascâpirau banâ! Pri prosuplu a lui îshi videa câ dinclo di cânticlu a gaidâiei eara unu omu tsi vrea s-bâneadzâ ama nu avea dzâli! Nu v-as agârshescu vârnâoarâ curtusulu cânticu, eara lunea buigeadzâlor la nunta featiei a lui atsea ma marea, elu îshi luă gaida, u umflă și-ahurhi unu cânticu tsi-l cânta daima. Ditu muntili dit omu tsi eara avea armasâ mashi aumbra! Ama cându cânta, ocljilji i-ascântiau, vrearea lui ti bana tsi-i tritsea multu aghonea ishea tru cânticlu a lui. Putearea îi s-avea dusâ, nu putu sâ-l dipiseascâ, ama plânsiră shi chetsarli cându îl avdzârâ, nu mashi oaminjilji tsi-l ascultarâ! Cari lu-avdzâ unâ oara, nu putu sâ-l agârsheascâ!
