Adunã, nveastã, culitseri ditu cãrtsâ
Acatsâ sh aprindi aluatlu
Ntsearni minduierli pristi elu
Lja-li ditu mardzinâ sh adu-li tru mesi
Frimitâ-li multu sh ghini
Ama cu angâtan s-nu li cheri
Zboarâli nu s-azvomu fârâ di minduiari.
Tu bitiseari, adarâ crutsea pisti eali
Anvâlea-li sh alasâ-li s-creascâ.
Tini andreadzi cireaplu
Arucâ tutâ cinusha ditu elu,
Adunâ prăshki ditu ayiñea a vreariljei
Sh aprindi foclu cu eali
Ardi-lu pânâ s-cadâ jarlu
Andreadzi tâvadzii, aundzi-lj cu miru
Mparti aluatlu frimtatu tu elji
Sh alasâ-lu s-crească pânâ s-umplâ
Arâspândea jarlu tu cireapu, calcâ-lu niheamă,.
Andreadzi tâvadzilj cu pirustriili
Sh câpâchisea ghini…
Dupu vârâ sihati di oarâ
Ciudusea-ti tsi pâni mushatâ adrashi.
Ascoati-u ditu tãvadz sh-abureadză-u.
Apoia ia di u-amparti:
Unâ cumatâ va u dai ti atselj
Ljirtats di Dumnidză
Sã s-hârseascâ sh elj câ anvitsashi tsiva.
Unâ cumată s-hibă ti atselji cari
Sh-arâdea câ hii amutâ
Sâ shtibâ sh elji nustimada a tâtseariljei.
Nai ma marea cumatâ va u dai
A tinirlor, s-adunâ culitserllji a zboarâlor
Sh s-adarâ pâni armâneascâ
Tora sh ti eta etilor.
Amin!
